Еліміздің Тұңғыш Президенті Нұрсұлтан Назарбаев бүгін Ресей президенті Владимир Путинмен телефон арқылы сөйлесті. Бұл туралы Елбасының баспасөз қызметі хабарлады.
Телефонмен әңгімелесу басында бауырлас мемлекеттің басшысы Елбасын 80 жылдық мерейтойымен құттықтап, оған мықты денсаулық және Қазақстан Республикасы халқының игілігі үшін жаңа жетістіктер тіледі.
Владимир Путин Нұрсұлтан Назарбаевтың тәжірибесі Қазақстан-Ресей қарым-қатынастарын одан әрі нығайтуға ықпал ететініне сенім білдірді.
Құттықтауды тыңдап, біздің мемлекетіміздің Тұңғыш Президенті Ресей Федерациясының көшбасшысына жылы лебіздері үшін алғыс айтты және Қазақстан мен Ресей арасындағы екіжақты ынтымақтастықты одан әрі дамытудың маңыздылығын атап өтті.
Бүгін Нұрсұлтан Назарбаев Ресейдің Қауіпсіздік кеңесі төрағасының орынбасары Дмитрий Медведевпен телефон арқылы сөйлесті.
Телефон арқылы әңгімелесу кезінде Медведев Нұрсұлтан Назарбаевты мерейтойымен құттықтап, Елбасы мәртебесі біздің ел мен Ресей арасындағы өзара іс-қимылды қамтамасыз етуге елеулі үлес қосуға мүмкіндік беретінін атап өтті.
Сондай-ақ, Нұрсұлтан Назарбаевты Тәжікстан президенті Эмомали Рахмон, Беларусь Президенті Александр Лукашенко және Өзбекстан президенті Шавкат Мирзиеев 80 жылдық мерейтойымен құттықтады.
