Ресей Федерациясының басшысы Владимир Путин посткеңестік мемлекеттердің басшылары мен азаматтарын, соның ішінде Қазақстанды, Ұлы Отан соғысы Жеңісінің 75 жылдығымен құттықтады. Бұл туралы ТМД Атқару комитетінің баспасөз қызметі хабарлады.
Владимир Путин бұрынғы Одақ елдерінің халықтары майданда батылдықпен неміс-фашистік басқыншыларын жеңген батырлардың ерліктерін ыстық ықыласпен есте сақтайтынын атап өтті.
Ресей басшысы посткеңестік мемлекеттер азаматтарының қасиетті борышы – өмірін сарп етіп Отанын қорғап қалған адамдарды есте сақтау болып табылатынын айтты.
Сондай-ақ, Путин Ұлы Отан соғысының тарихын қайта жазудың кез келген әрекеттеріне қарсы тұруға бағытталған батыл шаралар қабылдаудың маңыздылығына тоқталды.
Сонымен қатар, бауырлас мемлекет басшысы әкелеріміз мен аталарымыздың ерлігі туралы ортақ естелік бұрынғы Одақ елдері арасындағы түрлі салаларда, соның ішінде індетпен күресте ынтымақтастықты дамытуға ықпал ететініне сенім білдірді.
Владимир Путин барлық ардагерлерді, партизандарды және тыл еңбеккерлерін Ұлы Жеңіспен құттықтады, оларға шын жүректен алғыс айтты, сондай-ақ денсаулық, бақыт және ұзақ өмір тіледі.
Сурет: kp.ru
