Әлеуметтік желіде құқық қорғау органдарының қызметкерлері 24 шілдеге қараған түні тәртіпсіздік орын алып, нәтижесінде полиция қызметкерлері зардап шеккен Сәтбаев қаласында жаппай ұстау жүргізілді деген ақпарат шықты деп хабарлайды kazlenta.kz. жаңалықтар ресурсы.
Таратылған мәліметте полицияға шамамен 50-60 адам жеткізілгені айтылады. Сондай-ақ, ішкі істер органы қызметкерлері ұсталған адамдарды азаптап, қол жұмсағаны атап өтілген.
Бұл жөнінде Сәтбаев прокуратурасы пікір білдірді. Қадағалау органы желіде пайда болған жаппай ұстау және азаптау туралы ақпарат жалған және шындыққа сай келмейтінін мәлімдеді.
Сондай-ақ, прокуратура тәртіп сақшылары осы таратылым авторын анықтап, оған қатысты жалған ақпарат тарату фактісі бойынша қылмыстық іс қозғалғанын айтты. Мұндай әрекеттер үшін, ел заңнамасына сәйкес, оған мың айлық есептік көрсеткішке дейінгі мөлшерде айыппұл салу немесе бір жылға бас бостандығын шектеу немесе сол мерзімге бас бостандығынан айыру түрінде жаза беріледі.
Бұған дейін құқық қорғау органдарының қызметкерлері тәртіпсіздікті ұйымдастырды және оған қатысты деген күдікпен 16 адамның ұсталғаны хабарланған болатын. Тағы екі күдіктіге іздеу жарияланды.
Сурет: tengrinews.kz
