Қасым-Жомарт Тоқаев Қорғаныс министрі Нұрлан Ермекбаевты қабылдады, деп zakon.kz Ақордаға сілтеме жасай отырып хабарлайды.
Президент-Қарулы Күштердің Жоғарғы Бас қолбасшысы Қорғаныс министрінің ведомствоның ағымдағы жылдың бірінші тоқсанындағы қызметінің нәтижелері, армияның жауынгерлік әзірлігі мен әскери тәртіптің жай-күйі, сондай-ақ сыбайлас жемқорлыққа қарсы іс-қимыл жөніндегі шаралар туралы баяндамасын тыңдады.
Кездесу барысында коронавирустық инфекциямен күреске көп көңіл бөлінді. Нұрлан Ермекбаев әскери медицинаны ПТР-диагностика құралдарымен жабдықтау туралы баяндады. Министрдің айтуынша, Нұр-сұлтан және Алматы қалаларында екі зертхана, сондай-ақ Ақтау мен Семейде мобильді кешендер іске қосылды. Офицерлер мен сарбаздарды вакцинациялау жалғасуда. Бүгінгі күні Қарулы Күштер жеке құрамының 20% – ы егілді.
Қорғаныс министрі Мемлекет басшысының алдында “Алтын жебе” арнайы операциясы күштерінің оқу-жаттығуларының және “Қалқан-2021” кешенді ведомствоаралық оқу-жаттығуларының нәтижелері, сондай-ақ ағымдағы жылдың екінші жартыжылдығына белгіленген “Отпантау”стратегиялық оқу-жаттығуларына дайындық туралы есеп берді.
Сондай-ақ, Қасым-Жомарт Тоқаевқа Қазақстанның халықаралық әскери ынтымақтастығының негізгі бағыттары, Армияны әскери техникамен жабдықтау, Қарулы Күштердің тұжырымдамасын дамыту жөніндегі жұмыс барысы туралы баяндалды. Сонымен қатар, әңгіме барысында Отан қорғаушылар күні мен Жеңіс Күнін мерекелеуге дайындық, сондай-ақ 2022 жылы Қазақстан армиясының 30 жылдығына арналған салтанатты іс-шараларды ұйымдастыру мәселелері қаралды.
Соңында Жоғарғы Бас қолбасшы әскери ведомство басшысына елдің қорғаныс қабілетін одан әрі арттыруға бағытталған бірқатар тапсырмалар берді.
