Мемлекет басшысы Қасым-Жомарт Тоқаев Түркістан облысының әкімі Өмірзақ Шөкеевпен кездесу өткізді. Кездесу барысында еліміздің оңтүстік өңірін дамытуға қатысты мәселелер қаралды. Бұл туралы Қазақстан Президентінің баспасөз қызметі хабарлады.
Кездесу барысында Қасым-Жомарт Тоқаевқа Түркістан облысының биылғы жылдың 11 айындағы әлеуметтік-экономикалық дамуының қорытындылары бойынша ақпарат берілді.
Атап айтқанда, оңтүстік аймақ әкімінің айтуынша, осы уақыт ішінде облыста өндіріс көрсеткіштері 5,5%-ға артты. Сонымен қатар, мемлекет басшысына ауыл шаруашылығы мен инвестициялар көрсеткіштері 25%-ға, ал тұрғын үй құрылысы – 30%-ға өскені айтылды.
Әңгіме барысында Президент Тоқаев келесі жылдың қазан айында өтетін Түркістанның тұсаукесеріне дайындық барысы туралы хабардар болды.Өмірзақ Шөкеев Арыс қаласында қалпына келтіру жұмыстарының толық аяқталғанын баяндады.
Кездесу соңында Қасым-Жомарт Тоқаев облыс әкіміне газдандыру және өңір азаматтарының табысын арттыру, сондай-ақ атаулы әлеуметтік көмек көрсету мәселелеріне қатысты бірқатар тапсырмалар берді.
