Бүгін Қазақстан Республикасының Президенті Қасым-Жомарт Тоқаев “Самұрық-Қазына” ұлттық әл-ауқат қоры” АҚ басқарма төрағасы Ахметжан Есімовті қабылдады. Бұл туралы ҚР Президентінің баспасөз қызметі хабарлады.
Кездесу барысында Президентке Қазақстан ұлттық әл-ауқат қорының өткен жылғы жұмысының нәтижелері туралы ақпарат берілді.
Ахметжан Есімовтың айтуынша, 2019 жылдың қорытындысы бойынша “Самұрық-Қазына” қорының қаржылық көрсеткіштері ғана емес, өндірістік көрсеткіштері де артты.
Атап айтқанда, сатудан түскен кірістер 2018 жылы 10,1 триллион теңгеден 2019 жылы 10,7 триллион теңгеге дейін ұлғайды, сонымен қатар таза пайда 1,2 триллион теңгеге дейін өсті. 2018 жылғы бұл көрсеткіш 1,1 триллион теңгені құраған.
Сондай – ақ мемлекет басшысымен кездесу барысында Есімов ұлттық әл-ауқат қорының тағы бір жетістігін атап өтті – оның активтері 10%-ға артып, 26,5 триллион теңгені құрады.
Сонымен қатар, Қасым-Жомарт Тоқаев отандық өндірісті қолдауға, сондай-ақ жергілікті сатып алуды қамту үлесін қамтамасыз етуге бағытталған қор енгізген жаңа шаралар кешені туралы хабардар болды.
Сурет: akorda.kz
