Мемлекет басшысы Қасым-Жомарт Тоқаев Республиканың Бас прокуроры Ғизат Нұрдәулетовпен кездесті. Бұл туралы Қазақстан Президентінің баспасөз қызметі хабарлады.
Кездесу барысында Тоқаев еліміздің Бас прокуратурасы қызметінің нәтижелері туралы, оның ішінде бюджет қаражатының заңсыз шығындарының алдын алу бойынша жүргізіліп жатқан жұмыстар туралы есепті тыңдады.
Бас прокурордың айтуынша, Қазақстанда жолдарды жөндеуге және әлеуметтік инфрақұрылым нысандарын салуға арналған 130 конкурс бойынша 16,5 миллиард теңгеге заңсыз бюджеттік шығындардың алдын алуға қол жеткізілді.
Сондай-ақ, Ғизат Нұрдәулетовтың айтуынша, біздің мемлекетімізде “Жұмыспен қамтудың жол картасы” мемлекеттік бағдарламасы аясында жалған жұмысқа орналасудың 6 мыңнан астам фактісі анықталған.
Сонымен қатар, Президентпен кездесу барысында Бас прокурор елімізде дәрі-дәрмек айналымы саласындағы бұзушылықтарды анықтау және жолын кесу бойынша жүргізіліп жатқан жұмыстар туралы баяндады.
Нұрдәулетов қабылданған шаралардың арқасында Республикада заңсыз айналымнан 400 мың медициналық дәрі-дәрмек орамасы мен 12 миллион бетперде тәркіленгенін атап өтті.
Бас прокурордың баяндамасын тыңдағаннан кейін, Қасым-Жомарт Тоқаев оған дағдарысқа қарсы шараларды жүзеге асыруға бөлінген бюджет қаражатының жұмсалуын одан әрі бақылауды тапсырды.
Сурет: lada.kz
