Президент Қасым-Жомарт Тоқаев премьер-министр Асқар Мамин мен Денсаулық сақтау министрі Алексей Цойды қабылдады, деп хабарлады Ақорда.
“Мемлекет басшысына елдегі санитарлық-эпидемиологиялық жағдай, халықты вакциналау барысы, сондай-ақ әлеуметтік – экономикалық дамудың өзекті мәселелері туралы мәлімет берілді”, – делінген жұма күнгі хабарламада.
Тоқаевқа халықты вакциналау бойынша қабылданып жатқан шаралар туралы баяндалды. Асқар Маминнің мәлімдеуінше, сәуірден бастап ай сайын 2 млн адамға дейін иммундауға қол жеткізу жоспарланып отыр.
“Президентке отандық
QazVac вакцинасын өңірлерге жеткізу туралы есеп ұсынылды. Премьер-Министр хабарлағандай, Қазақстан COVID-19-ға қарсы вакцина шығаратын мемлекеттердің ондығына және өз әзірлемелерін тіркеген елдердің бестігіне кірді. 26 сәуірден бастап “ASHYQ” қосымшасы барлық салаларда ауқымды пайдалана басталды, бұл экономиканың түрлі секторларына “қызыл” және “сары” аймақтар жағдайында қауіпсіз жұмыс істеуге мүмкіндік береді”, – деп жазады Президенттің баспасөз қызметі.
Мемлекет басшысына ұсынылған деректерге сәйкес, қазіргі уақытта инфекциялық төсектердің жүктемесі 42%-ды, реанимациялық төсектердің жүктемесі 28%-ды құрайды. Дәрілердің, жеке қорғану құралдарының қажетті қоры жасалды, ПТР-зертханалардың қуаты тәулігіне 123 мың тестке дейін артты. Қорда 25 мыңнан астам төсек-орын бар, барлық өңірлерде заманауи жабдықталған жаңа инфекциялық ауруханалар жұмыс істеуде.
Сондай-ақ, Мамин
Тоқаевқа Еуразиялық үкіметаралық кеңестің алдағы 29-30 сәуірдегі отырысына дайындық барысы туралы айтты. Кездесу барысында инвестициялар тартуға, халықты жұмыспен қамтуға байланысты мәселелер көтерілді.
“Соңында Президент үкіметке отандық вакцина өндірісін ұлғайту және оның азаматтар үшін қолжетімді болуын қамтамасыз ету жұмысын ерекше бақылауға алуды тапсырды”, – делінген хабарламада.
