Қазақстан Республикасының Президенті Қасым-Жомарт Тоқаев әлеуметтік кәсіпкерлік өкілдерімен кездесті.Кездесу барысында бизнеске қатысты мәселелер талқыланды. Бұл туралы Ақорданың баспасөз қызметі хабарлады.
Қазақстан басшысымен кездесуге «Дастархан» компаниясының директоры Елена Мащинская, Green TAL әлеуметтік шеберханасының жетекшісі, Best for kids қоғамдық қорының вице-президенті Эмин Аскеров, сондай-ақ «Қамқор отау» қазақстандық дербес тұру Орталығының директоры, «Кафе тренингі» әлеуметтік жобасының үйлестірушісі Бақытжан Худияров қатысты.
Әңгіме барысында Қасым-Жомарт Тоқаевқа республикадағы әлеуметтік кәсіпкерліктің жағдайы баяндалды. Сонымен қатар, президентке оны одан әрі дамытудың негізгі бағыттары туралы мәлімет берілді.
Сондай-ақ кездесу аясында мемлекет басшысына әлеуметтік кәсіпкерліктегі өзекті мәселелер туралы айтылды. Бизнесмендердің айтуынша, қазіргі таңда бұл салада орын-жайлар мен өткізу орындарының тапшылығы байқалуда.
Сонымен қатар, кәсіпкерлер мемлекет тарапынан көрсетіліп жатқан қолдауға жоғары баға берді және Тоқаевқа әлеуметтік кәсіпкерлердің бірінші республикалық форумын өткізу жоспарымен таныстырды.
Қасым-Жомарт Тоқаев, өз кезегінде, осындай идеяны мақұлдады, кәсіпкерлерге қоғам үшін өте пайдалы жобаларды табысты іске асырғандары үшін алғысын білдірді, сондай-ақ Қазақстан Республикасында әлеуметтік бизнеске мемлекет тарапынан қолдау көрсетілетінін хабарлады.
Сурет: akorda.kz
