Республикалық бюджеттің атқарылуын бақылау жөніндегі есеп комитетінің өкілеттіктерін кеңейтуді көздейтін Жарлыққа еліміздің көшбасшысы Қасым-Жомарт Тоқаев қол қойды, деп хабарлайды “ҚазТАГ”.
Енді есеп комитеті жыл сайын бизнесті жүргізу жеңілдігі бойынша өңірлер мен қалалар рейтингін жасап, оның нәтижелерін Президент Әкімшілігіне жіберуі тиіс.
Осы рейтингті жүргізу және бекіту әдістемесін әзірлеу функциялары да есеп комитетіне жүктеледі.
Рейтинг жеңімпаздары дипломдармен және төс белгілерімен марапатталатын болады, оларды дайындау және рәсімдеуге де есеп комитеті жауап береді.
Сондай-ақ, бұл ведомство бизнесті жүргізу жеңілдігі бойынша өңірлер мен қалалар рейтингінің қорытындыларын шығару комиссиясының отырыстарын өткізуге жәрдем көрсетеді.
Бүгінгі таңда Республикалық бюджеттің атқарылуын бақылау жөніндегі есеп комитетін Наталья Годунова басқарады. Сондай-ақ, ол Президент жанындағы сыбайлас жемқорлыққа қарсы іс-қимыл жөніндегі комиссияның құрамында және республиканың жетекші партиясы Nur Otan саяси кеңесі бюросының мүшесі.
