Марғұлан Баймұхан Бельгиядағы Төтенше және Өкілетті Елші, сондай-ақ Қазақстанның Еуропалық Одақ пен НАТО-дағы өкілдігінің басшысы болып тағайындалды, деп Tengrinews.kz Ақорда сайтына сілтеме жасай отырып хабарлайды.
“Баймұхан Марғұлан Бақытұлы Қазақстан Республикасының Бельгия Корольдігіндегі Төтенше және Өкілетті Елшісі, Еуропалық Одақ және Солтүстік Атлантикалық Шарт Ұйымы (НАТО) жанындағы Қазақстан Республикасы өкілдігінің басшысы болып тағайындалды”, – делінген хабарламада.
Марғұлан Баймұхан 1974 жылы 6 қыркүйекте Алматы облысында дүниеге келген. Польшада Краков экономикалық университетін және Канаданың Ванкувер университетін бітірген. Халықаралық басқарудағы ғылым магистрі, іскерлік әкімшілік магистрі.
Еңбек жолын Daewoo Electronics компаниясында маркетинг және коммерция мәселелері жөніндегі менеджер болып бастады. 1997 жылы River System Ltd компаниясының Польшадағы экспорт бөлімінде маман, кеңесші, аймақтық директор (Оңтүстік Кавказ және Орталық Азия елдері) болып жұмыс істеді.
1999 жылдан бері дипломатиялық қызметте. СІМ орталық аппаратында түрлі лауазымдарды атқарды. Қазақстанның Польшадағы елшілігінде жұмыс істеді. 2017 жылдан 2019 жылға дейін Қазақстанның Польшадағы елшісі болды.
Қазақстанның Бельгиядағы елшісі лауазымына тағайындалғанға дейін Қазақстан Сыртқы істер министрінің орынбасары болды.
II сыныпты Төтенше және Өкілетті Уәкіл дипломатиялық дәрежесі бар.
