Бүгінгі күні авиация саласында тасымалдау көлемінің өсу үрдісі оң байқалады. Бұл ретте азаматтық авиация саласындағы жұмысты одан әрі жетілдіру және белгіленген барлық жоспарларды уақтылы орындау қажет. Бұл туралы ҚР Премьер-министрі Асқар Мамин мәлім етті, деп ХАА «ҚазАқпарат» хабарлайды.
«Ұлт жоспарының 73-қадамына сәйкес тұрақты әуе қатынасы орнатылды. Индустрия және инфрақұрылымдық даму министрлігіне Ұлттық экономика, қаржы, сыртқы істер министрліктерімен бірлесіп, бұл жұмысты 2020 жылы Шанхай және Сингапурға рейс ашу жоспарында жалғастыруды тапсырамын. Сондай-ақ Нью-Йорктегі ұшуларды ашу үшін отандық авиакомпанияларды аккредиттеу рәсімдерін аяқтау қажет. Жалпы, бұл мәселе бойынша мемлекет тарапынан қолдау бар және авиакомпаниялардың жұмысын жандандыру қажет», – деді Асқар Мамин Үкімет отырысында.
Ол сондай-ақ Қазақстан өңірлеріндегі әуежайлардың ұшу-қону жолақтары мен терминалдарын қалпына келтіру қажеттігіне назар аударды.
«Шетелдік инвестор мен Шымкент әуежайының терминалының қатысуымен Түркістанда әуежайдың құрылысы сапалы және белгіленген мерзімде аяқталуы тиіс. Шымкент қаласында ТМД-ның мәдени астанасы деп жариялануына байланысты бірқатар іс-шаралар өткізу жоспарланғаны белгілі. Бүгінгі таңда авиатерминал құрылысы бойынша тиісті жұмыстарды қамтамасыз ету қажет», — деп атап өтті Премьер.
Асқар Мамин сонымен қатар Индустрия және инфрақұрылымдық даму министрлігіне отандық әуежайларда шетелдік тасымалдаушыларға «ашық аспан» режимін ұсыну бойынша жұмысты жандандыруды тапсырды.
Бұдан бұрын мәжіліс барысында ҚР Индустрия және инфрақұрылымдық даму министрі Бейбіт Атамқұлов азаматтық авиациядағы негізгі көрсеткіштердің өсуі туралы айтып берді.
