Қазақстан Министрлер кабинетінің басшысы Асқар Мамин жұмыс сапарымен Солтүстік Қазақстан облысына барды. Онда өнеркәсіп кәсіпорындарының қызметімен танысты.Бұл туралы ҚР премьер-министрінің баспасөз қызметі хабарлады.
Үкімет басшысының жұмыс сапары Тұңғыш Президент Нұрсұлтан Назарбаев бастамашылық еткен индустриялық-инновациялық даму мемлекеттік бағдарламасы мен Президент Тоқаевтың Солтүстік Қазақстанның әлеуметтік-экономикалық дамуы жөніндегі тапсырмалары аясында өтті.
Премьер-министр Петропавлға сапарында жуғыш құралдар мен тұрмыстық химия тауарларын өндірумен айналысатын «Рим-КазАгро» ЖШС фабрикасының ашылуына қатысты.
Бұдан кейін Асқар Мамин «Киров атындағы зауыт» АҚ-ның аумағына болып, кәсіпорынды технологиялық жаңғырту туралы мәлімет алды. Биылғы жылы зауыт 2,2 миллиард теңгеге заманауи станоктар алды. Қазір кәсіпорын компьютерлік техниканы дайындауды қолға алуда.
Сондай-ақ, Үкімет басшысы «Петропавл ауыр машина жасау зауытында»болды. Бұл жерде оған тез бұзылатын өнімдерді тасымалдау үшін термос-вагондар өндірісінің жаңа желісін іске қосу туралы ақпарат берілді.
Солтүстік Қазақстанға жұмыс сапары кезінде Асқар Мамин Тайынша қаласына барды, онда Bio operations зауытының екінші желісі — крахмал мен желімтек өндіру цехының ашылуына қатысты.
Премьер-министрдің жұмыс сапарының қорытындысы бойынша осы жылдың 10 айы ішінде аймақтағы өнеркәсіп өнімінің көлемі 193,8 миллиард теңгені құрағанын атап өтті. Бұл көрсеткіш өткен жылғы осы кезеңмен салыстырғанда 1,1%-ға артық.
