Қазақстан Үкіметі басшысы Асқар Мамин министрліктердің, әкімдіктер мен компаниялардың өкілдеріне жүгіну барысында мемлекеттің барлық әлеуметтік міндеттемелері орындалатынына сендірді. Бұл туралы «Қазақпарат» ақпарат агенттігі хабарлайды.
«Әкімдіктерге бағаны тұрақтандыру үшін әлеуметтік маңызы бар тауарлар бойынша нарықтарда тауар интервенцияларын жүргізу үшін тұрақтандыру қорларының тиімді жұмысын қамтамасыз етуді тапсырамын. Индустрия және инфрақұрылымдық даму министрлігі мүдделі мемлекеттік органдармен және «Атамекен» палатасымен бірге отандық тауар өндірушілердің үлесін арттыру жөніндегі жұмысты жандандырсын», — деп атап өтті Премьер-Министр.
Сондай-ақ, Үкімет басшысы ағымдағы міндеттемелерді орындаумен байланысты емес шетел валютасын сатып алуға бағытталған операцияларды аяқтау туралы тапсырмалар берді. Қаржы министрлігі мемлекеттік органдармен бірлесіп бір апта ішінде басым емес инвестициялық жобаларды орындау мерзімін ауыстыра отырып, бюджеттік шығыстардың басымдықтарын қайта қарау жөнінде ұсыныстар енгізуі керек. Еңбек және халықты әлеуметтік қорғау министрлігіне уақытылы әлеуметтік төлемдерді толық көлемде қамтамасыз ету тапсырылды.
«Біздің ортақ міндетіміз — әлеуметтік тұрақтылық пен жұмыспен қамтуды қамтамасыз ету. Жұмыс орындарын сақтап қалуға және жаңаларын құруға ерекше назар аудару қажет. Мемлекеттің барлық әлеуметтік міндеттемелері орындалатынын атап өткім келеді. Барлық зейнетақы мен жәрдемақы уақытылы және толық көлемде төленеді», — деді Үкімет басшысы.
Сурет: lenta.inform.kz
