Қазақстан премьер — министрі Асқар Маминнің төрағалығымен Үкіметтің селекторлық отырысы өтті,оның барысында еліміздің өңірлерін алдағы жылыту маусымына дайындау мәселелері талқыланды.
Отырыста жылу беру маусымына жүргізіліп жатқан жұмыстар туралы энергетика министрлігі басшысының бірінші орынбасары Махамбет Досмұхамбетов, индустрия және инфрақұрылымдық даму министрі Бейбіт Атамқұлов, білім және ғылым министрі Асхат Аймағамбетов, денсаулық сақтау вице-министрі Олжас Әбішев, Батыс Қазақстан облысының әкімі Ғали Искалиев және Нұр-Сұлтан қаласының әкімі Алтай Көлгінов, сондай-ақ премьер-министрдің орынбасары Роман Скляр сөз сөйледі.
Отырыс барысында бүгінгі күні өңірлерде 10606 автономды қазандық, 45908 тұрғын үй дайындалды, 4 943,4 шақырым жылу желілері мен 14 917,1 шақырым сумен жабдықтау желілері жөнделді. Сонымен қатар жылу беру маусымына дайындық актісін 2527 балабақша мен 6656 мектеп алды.
«Жылыту маусымына дайындық жұмыстары жүргізілуде. Алайда, кестелерден қалыс қалу, коммуналдық мұқтаждықтар мен халық үшін отын дайындау деңгейінің төмендігін көрсететін фактілер бар. Осыған байланысты әкімдерге жоспарланған барлық жөндеу жұмыстарын белгіленген мерзімде аяқтауды және қажетті көлемде отынды уақтылы жеткізуді қамтамасыз етуді тапсырамын», — деді Мамин.
Сондай-ақ, Үкімет басшысы еліміздің өңірлерінің әкімдеріне көмір дайындау және өткізу пункттері инфрақұрылымының ағымдағы жағдайын тексеруді тапсырды.
Бұдан басқа, премьер-министр индустрия және инфрақұрылымдық даму министрлігіне «Қазақстан Темір жолы»ҰК» АҚ-мен бірлесіп көмір жеткізу үшін қажетті мөлшерде вагондармен қамтамасыз етуді тапсырды.
«Өңірлерде кәсіпорындар жеткізген газ бен көмір үшін дебиторлық берешегін, сондай-ақ коммуналдық қызметтер тұтынушыларына берешекті өтеу бойынша жұмысты күшейту қажет»,-деді премьер-министр.
