Біздің республикамыздың Министрлер Кабинетінің басшысы Асқар Мамин биылғы жылдың 25 тамызына дейін барлық оқушылар қажетті оқулықтармен қамтамасыз етілуі тиіс деп мәлімдеді. Бұл туралы ҚР премьер-министрінің баспасөз қызметі хабарлады.
Үкімет отырысында сөз сөйлеген Асқар Мамин Білім министрлігі мен әкімдіктерге оқушыларды оқулықтармен ғана емес, олардың электрондық нұсқаларымен қамтамасыз етуді тапсырды.
Министрлер Кабинетінің басшысы Цифрлық даму министрлігіне еліміздің елді мекендерін интернет желісімен үздіксіз қамтамасыз ету жөнінде шаралар қабылдауды тапсырды.
“Әкімдіктер мен денсаулық сақтау министрлігі оқу орындарында, әсіресе дәстүрлі күндізгі форматта оқуын жалғастыратындар және “кезекші” кіші сыныптары бар мектептерде қатаң санитарлық-эпидемиялық нормаларды сақтау бойынша барлық қажетті шаралар қабылдасын”, – деді Асқар Мамин.
Премьер-министр 25 тамызға дейін барлық оқушылар мен педагогтар жаңа оқу жылының қашықтан басталуына толық дайын болуы тиіс екенін ерекше атап өтті.
Сурет: 24.kz
