Петропавлда жаяу жүргіншілер өтпесінде адамды көлік соғып кетті. Қатты соққыдан ер адамның аяғы үзіліп кетті, деп хабарлайды Казинформ
Куәгерлердің мәлімдеуінше, қайғылы оқиға 3-ші емханаға қарама-қарсы болған. Көлік жүргізушісі оқиға орнынан бой тасалаған.
Солтүстік Қазақстан облысы полиция департаментінің баспасөз қызметі жол-көлік оқиғасын растады.
“Кизатов көшесінде жаяу жүргіншіні қағып кеткен Mitsubishi Montero Sport автокөлігінің 30 жасар жүргізушісі полиция қызметкерлерімен ұсталды. Қажетті тергеу шаралары жүргізілуде. Медициналық куәландыру актісіне сәйкес, жүргізуші мас күйінде болған”, – деп хабарлады баспасөз қызметі.
ЖКО фактісі “Көлік құралдарын жүргізуші адамдардың жол қозғалысы ережелерін бұзуы, абайсызда адам денсаулығына ауыр зиян келтіруге әкеп соққан”қылмыстық бабы бойынша сотқа дейінгі тергеудің бірыңғай тізіліміне енгізілді.
