Петропавл қалалық сотында Тайынша ауданының 36 жастағы тұрғынына қатысты қылмыстық істі қарау бойынша сот талқылауы өтті.
Ер адам діни алауыздықты қоздырып, терроризмді насихаттауға бағытталған қасақана әрекеттер жасады деп айыпталды.
Тергеу мәліметтері бойынша, Солтүстік Қазақстан тұрғыны 2018-2019 жылдар аралығында интернет-ресурстардан террористік сипаттағы қарулы қақтығысқа қатысуға, оның ішінде қарулы жиһадқа қатысуға итермелеу белгілері бар фото – және бейнематериалдарды жүктеген.
Сот отырысы кезінде сотталушы интернеттен радикалды сипаттағы белгілері бар материалдарды жүктеп алғанын мойындады. Алайда, ол лаңкестікті насихаттаумен айналыспағанын айтты.
Сотқа ұсынылған дәлелдер негізінде ер адам тағылған айыптарға кінәлі деп танылды. Оның әрекеттері қоғам үшін үлкен қауіп төндіретінін ескере отырып, оны жеті жылға бас бостандығынан айырды.
Петропавл қалалық сотының үкімі әлі күшіне енген жоқ, осыған байланысты Солтүстік Қазақстан тұрғынының оны даулауға мүмкіндігі бар.
Сурет: timeskz.kz
