Қазақстан Республикасының Тұңғыш Президенті күні қарсаңында Ресей Ұлттық кітапханасында атақты философ және ғалым Әбу Насыр Әл-Фарабидің 1150 жылдығына, сондай-ақ ұлы ақын және ағартушы Абай Құнанбаевтың 175 жылдығына және қазақ шығыстанушы ғалымы Шоқан Уәлихановтың 185 жылдығына арналған кітап экспозициясының ашылу рәсімі өтті. Бұл туралы Ресейдегі Қазақстан елшілігінің баспасөз қызметі хабарлады.
Көрмені Санкт-Петербургтегі Қазақстан Республикасының Бас консулдығы осы қаладағы “Ата-Мекен”қазақ диаспорасымен бірлесіп ұйымдастырды.
Экспозицияның ашылуына ТМД Парламентаралық Ассамблеясының және ҰҚШҰ Парламенттік Ассамблеясының өкілдері, Ресей ұлттық кітапханасының басшылары, сондай-ақ Санкт-Петербургте тұратын қазақ және басқа да диаспоралардың өкілдері қатысты.
Көрмеде әл-Фараби, Абай Құнанбаев және Шоқан Уәлихановтың шығармашылығына қатысты әлемнің түрлі тілдерінде жарық көрген 150-ден астам экспонат ұсынылды.
Ресей ұлттық кітапханасының басшылары өткізіліп жатқан көрменің екіжақты серіктестікті дамыту мен тереңдетудегі маңыздылығын атап өтті. Сарапшылардың пікірінше, бұл іс-шара Ресейдің Солтүстік астанасының аудиториясын қазақ халқының мәдени мұрасымен және рухани байлығымен таныстыруға тамаша мүмкіндік берді.
Салтанатты шара соңында Қазақстанның Санкт-Петербургтегі Бас консулы Бауыржан Досманбетов Ресейдің ұлттық кітапханасына Ұлы Абайдың шығармашылық мұрасына арналған заманауи кітаптарды сыйға тартты.
Сурет: kzkazan.ru
