Прокуратура Павлодар облысы полиция Департаментінің жұмысында бірқатар елеулі заң бұзушылықтарды анықтады, деп хабарлайды Tengrinews.kz жорналшысы.
Негізінен прокуратурада зорлық-зомбылық қылмыстары, оларды ашу шаралары және олардың алдын алу жағдайлары сұрақтар тудырды. Өткен жылы денсаулыққа ауыр зиян келтіру фактілерінің саны, 2017 жылмен салыстырғанда, 144-тен 150-ге дейін артқан.
Прокуратураның пікірінше, осындай қылмыстар санының өсуінің негізгі себептері уәкілетті органдардың қанағаттанғысыз профилактикалық жұмысы және алкоголизмге қарсы күрестің жоқтығы болып табылады. Кісі өлтіру мен өліммен аяқталған ЖКО-ның көпшілігін адамдар мас күйінде жасайды. Өткен жылы ішімдіктің салдарымен 925 қылмыс жасалған.
Отбасылық-тұрмыстық салада да қылмыстар санының өсуі байқалады. Полиция қызметкерлерінің отбасындағы зорлық-зомбылыққа байланысты құқық бұзушылықтарды номенклатуралық істерге шығарғаны және олар бойынша тиісті шаралар қолданылмаған жағдайлар анықталды.
Прокурорлық ұсыным бойынша полиция департаменті қызметтік тергеу жүргізуде, оның нәтижелері бойынша кінәлі лауазымды тұлғалар тәртіптік жауапкершілікке тартылады. Маскүнемдіктің алдын алу бойынша полиция департаменті облыстық мәслихатқа «көңіл көтеру» мекемелерінің жұмысын шектеу туралы ұсыныс енгізді, ол үшін заңнаманы өзгерту қажет. Депутаттар мәжіліске өтініш жіберді.
Сурет: Wikimapia
