Павлодар облысының бұрынғы әкіміне босатудан бас тартылды, ол сот отырысына дейін қамауда қалады. Бұл туралы Павлодар облыстық сотының өкілі Әнел Құсанова хабарлады.
Оның айтуынша, апелляциялық сот бұрынғы Павлодар шенеунігіне қатысты бұлтартпау шарасын өзгеріссіз қалдыруды шешті. Сонымен қатар, адвокаттардың жеке шағымы да қанағаттандырылмады.
Қазіргі уақытта Болат Бақауовқа қатысты қызметтік өкілеттігінен асыра пайдаланды деген күдікпен сотқа дейінгі тергеу жүргізілуде.
Ол қадағалау органының қызметкері Рустам Сәдуақасовтың өтініші бойынша екі ай мерзімге қамауға алынды. Егер Бақауов бостандықта болса, онда ол тергеу барысына ықпал ете алады немесе жасырына алады.
Бұған дейін отандық ақпараттық интернет-ресурстарда қауіпсіздік құрылымдарының қызметкерлері Болат Бақауовты ұстады деген ақпарат пайда болды.
Кейін Қазақстан Ұлттық қауіпсіздік комитетінің өкілдері бұрынғы шенеунікке қатысты қызметтік өкілеттігін асыра пайдаланғаны үшін қылмыстық іс қозғалғанын мәлімдеді.
Сурет: Zakon.kz
