Болгарияның вице-президенті Илияна Йотова Павлодар облысының әкімі Болат Бақауовпен кездесті. Бұл туралы облыс әкімдігінің баспасөз қызметі хабарлады.
Кездесу барысында облыс әкімі оған бүгінгі таңда өңірде жүзге жуық ұлт өкілдері тұрып жатқанын айтты.
“Алғашқы Болгар қоныс аударушылары 1907-1908 жылдары қазіргі Павлодар облысына келіп қоныстанып, жаңа Разумовка мен Андрияновка ауылдары пайда болды, ғасырлар бойы этникалық болгарлар өңірдің экономикалық және әлеуметтік саласын дамытуға өз үлесін қосып келеді,елдің тағдыры, тарихы, мәдениетінің ажырамас бөлігі болып табылады, ал облыста жұмыс істеп жатқан болгар этномәдени “Славяне” орталығы Қазақстанның үкіметтік емес секторының толыққанды мүшесі болып, өңірдегі бейбітшілікті, бірлік пен келісімді нығайтуға ықпал етеді”, – деді әкім.
Сондай-ақ Болат Бақауов Павлодар облысының Болгариямен өзара іс-қимылының одан әрі дамуына сенім білдірді және екіжақты ынтымақтастықты жолға қоюға мүмкіндігінше қолдау көрсететінін мәлімдеді.
Өз кезегінде Болгарияның вице-президенті аймақ басшысына Болгар диаспорасына қолдау көрсеткені үшін алғысын білдірді.
Павлодар облысының әкімдігінде Болгарияның вице-президенті Павлодарға Болгар диаспорасының өкілдерімен кездесу үшін келгенін атап өтті.
