Екібастұзда төтенше жағдай режимін қамтамасыз ету бойынша қалалық штаттың отырысы өтті, оған Павлодар облысының әкімі Әбілқайыр Сқақов қатысты, деп хабарлайды zakon.kz ақпарат арнасы.
Отырыс барысында облыс басшысы Екібастұзда қала ведомстволары арасында үйлесімді өзара іс-әрекет жоқ екенін, осыған байланысты карантиндік режим толық көлемде қамтамасыз етілмегенін атап өтті.
Облыс әкімі әлі күнге дейін Екібастұздан карантинге жабылған үйлердің тұрғындары оқшаулау ережелерін сақтамайтыны туралы ақпарат түсіп жатқанын мәлімдеді.
“Яғни, қалалық әкімдік, төтенше жағдай режимін қамтамасыз ету жөніндегі қалалық жедел штаб жағдайды тұрақтандыру үшін шұғыл шаралар қабылдаған жоқ”, – деді Скаков.
Осыған байланысты Әбілқайыр Сқақов Екібастұз әкімі Ержан Иманзаиповтың жұмысын сынға алып, оған сөгіс жариялады. Сонымен қатар, аймақ басшысы регламентке сәйкес жұмыс істемейтін емханалардың бас дәрігерін, қаланың бас санитарлық дәрігерін жауапкершілікке тартуды тапсырды.
Отырыс соңында Сқақов Екібастұзда COVID-19-ға тестілеу үшін зертхана ашу қажеттігі туралы мәлімдеді және осы мәселені қысқа мерзімде пысықтауды тапсырды.
