Павлодар облысының бұрынғы әкімі Болат Бақауовқа қызметтік өкілеттігін асыра пайдаланғаны үшін бұлтартпау шарасы өзгертілді, енді ол үй қамауында болады. Бұл туралы Павлодар облыстық сотының баспасөз қызметі хабарлады.
Сот күдікті экс-әкімді үйде қамауға алу түріндегі бұлтартпау шарасын өзгерту туралы шешім қылмыстық қудалау қызметінің басшысымен келісілгенін айтты.
Сондай-ақ, облыстық соттың өкілдері Болат Бақауовқа қандай жағдайда бұлтартпау шарасы өзгертілгенін түсіндірді. Мәселен, бұрынғы шенеунік әкім бола отырып, тергеу барысына әсер етуі мүмкін болғандықтан қамауға алынды. Алайда, қазір ол мұндай лауазымды атқармайды, сондықтан тергеу іс-шараларына кедергі келтіре алмайды.
Бұрынырақ Болат Бақауов бостандыққа шығуға тырысты, бірақ аппеляциялық сот бұрынғы Павлодар шенеунігіне қатысты бұлтартпау шарасын өзгертпей қалдыруды шешті.
Іс материалдары бойынша, Павлодар облысының бұрынғы әкімі қызметтік өкілеттігін асыра пайдаланды деген күдікке ілініп отыр. Тергеу жалғасуда.
Сурет: footboom.com
