Қазақстанның цифрлық даму, инновация және аэроғарыш өнеркәсібі министрі Асқар Жұмағалиев Павлодар облысына жұмыс сапарымен барды, оның барысында еліміздің шалғай ауылдары мен кенттерін жоғары жылдамдықты интернетпен қамтамасыз ету жөніндегі жобаның іске асырылуын тексерді.
Министрдің айтуынша, жоба «Цифрлық Қазақстан» мемлекеттік бағдарламасы аясында жүзеге асырылуда. Жұмыс сапары барысында Жұмағалиев биылғы жылы республиканың 685 ауылында жоғары жылдамдықты интернет өткізу жоспарланып отырғанын хабарлады. Бүгінгі күні Павлодардың 9 ауылда интернет қосылды.
«Республиканың ауылдық елді мекендерін кең жолақты қолжетімділікпен қамтамасыз ету жөніндегі жобаның өзі ең ірі және бірегей болып табылады. Ол Қазақстан Республикасының Тұңғыш Президенті-Елбасы Нұрсұлтан Назарбаевтың тапсырмасы бойынша «Цифрлық Қазақстан» бағдарламасы аясында жүзеге асырылады. Телекоммуникациялық инфрақұрылымның құрылысы шалғайдағы ауылдарда әлеуметтік сала объектілері, бюджеттік ұйымдар мен мемлекеттік мекемелер үшін жоғары жылдамдықты интернетке қолжетімділікті ашады. Бұл сандық қызметтер мен сервистердің ену деңгейін арттыруға мүмкіндік береді, білім беру, денсаулық сақтау және қауіпсіздік сияқты салаларды дамыту есебінен халықтың өмір сүру сапасын арттыруға оң ықпал етеді», – деп атап өтті министр.
Сондай-ақ, өзінің жұмыс сапары аясында Жұмағалиев «Павлодар» арнайы экономикалық аймағында және облыстың ірі кәсіпорындарында, атап айтқанда «Павлодар мұнайхимия зауыты» ЖШС, «Гиссенхаус» ЖШС және «Проммашкомплект» ЖШС-да болды.
Сонымен қатар, цифрлық даму министрлігінің басшысы «Азаматтарға арналған үкімет «КЕАҚ» мемлекеттік корпорациясының филиалына барып, өңірлік филиалдағы әріптестерімен кездесу өткізді. Олармен әңгімелесу барысында министр кезектердің туындауына жол бермей, орталық мамандарының жедел жұмыс істеуі үшін тиісті шаралар қабылдау қажеттігін атап өтті.
