Павлодар облысының бас санитарлық дәрігері Батырбек Әлиев аймақ аумағында шектеу шараларын қатаңдату туралы жаңа қаулыға қол қойды. Бұл туралы санитарлық-эпидемиологиялық бақылау департаментінің өкілі Ғизат Әбешев айтты.
Оның айтуынша, аймақта коронавирус ауруының өсуіне байланысты карантиндік режим күшейтіледі. Бүгінгі таңда Павлодар облысы эпидемияның таралу қарқыны бойынша “қызыл” аймақта. Онда барлығы 10573 жұқтыру жағдайы тіркелген.
Жаңа қаулыға сәйкес, сауда-ойын-сауық орталықтарына, азық-түлік және жабық емес базарларға демалыс күндері жұмыс істеуге тыйым салынады. Жұмыс күндері СОО 22:00-ге дейін, ал жабық базарлар 19:00-ге дейін ашық болады.
Сондай-ақ демалыс күндері әртүрлі спорт нысандарына, моншаларға, сауналарға және СПА-орталықтарына жұмыс істеуге рұқсат етілмейді. Сонымен қатар, сенбі және жексенбі күндері Павлодар облысының аумағында қоғамдық көліктер жүрмейтін болады.
Бас санитарлық дәрігердің қаулысына сәйкес ұйымдар мен мекемелер қызметкерлерінің 80% қашықтықтан жұмыс режиміне ауыстырылады.
Құжат 20 қаңтардан бастап күшіне енеді. Бұл құжатқа коронавирустың таралуын болдырмау мақсатында қол қойылды.
Сурет: liter.kz
