Павлодарда “Майдан жолы” жергілікті іздестіру жасағының төрағасы Александр Шитовқа “III дәрежелі іздестіру қозғалысындағы ерекшелігі үшін” медалін тапсыру рәсімі өтті. Бұл туралы Нұр-Сұлтандағы Ресей Ғылым және мәдениет орталығының баспасөз қызметі хабарлады.
Салтанатты іс-шара барысында Қазақстандағы Ресей ынтымақтастығы өкілдігінің басшысы Алексей Коропченко Александр Шитов пен ол басқарып отырған іздестіру жасағының қызметін жоғары бағалады.
“Атақты қолбасшы Александр Суворов айтқандай: қаза тапқан соңғы сарбаз жерленбейінше соғыс аяқталмайды”, – деді Коропченко.
Шитов “III дәрежелі іздеу қозғалысындағы ерекшелігі үшін” медалін Ұлы Отан соғысында қаза тапқандардың және хабар-ошарсыз кеткен сарбаздардың есімдерін анықтау жұмысына қосқан елеулі үлесі үшін алды.
Бұл Ресей Федерациясы Қорғаныс министрлігінің тағайындаған медальі.
Біздің республикамыздағы Ресей ынтымақтастығы өкілдігінің ақпараты бойынша, Павлодар іздестіру жасағы 245 жауынгердің мәйітін тапты, сондай-ақ жерлес батырларға 17 жаңа ескерткіш, гранит стелалары, мемориалдық тақталар мен мүсіндер орнатты.
Сурет: kaz.rs.gov.ru
