Қазақстан Парламенті Сенатының төрағасы Дариға Назарбаева ЕҚЫҰ-ның аз ұлттар істері жөніндегі жоғарғы комиссары Ламберто Заньермен кездесу өткізді.Кездесу барысында біздің еліміздің және ЕҚЫҰ-ның ынтымақтастығы мәселелері қаралды. Бұл туралы ҚР Парламенті жоғарғы палатасының баспасөз қызметі хабарлады.
Кездесу барысында Қазақстан мен ЕҚЫҰ арасындағы ынтымақтастықтың негізгі перспективалы бағыттарын атап өтті. Бұл «Көп ұлтты қоғамдағы полиция қызметі», сандық БАҚ, қоғамды ақпараттандыру жағдайындағы мәдени өзгеріс жобалары.
Сондай-ақ Дариға Назарбаева Ламберто Заньерге бүгінгі күні Қазақстанда тілдерді дамыту мемлекеттік бағдарламасы аясында ұлттық және жексенбілік мектептердің қызметіне қолдау көрсетілетінін айтты.
«Жыл сайын мемлекеттік тілді білу деңгейі артып келеді. Біз практикалық ынтымақтастықты жалғастыруға мүдделіміз», – деді Сенат төрағасы.
Сонымен қатар, Парламент жоғарғы палатасының төрағасы Сенат жұмысын ЕҚЫҰ ПА аясында күшейту қажет деп санайды. Өз кезегінде, Заньер ЕҚЫҰ біздің елмен ынтымақтастыққа үлкен мән беретінін айтты.
