Сенаттың баспасөз қызметі Парламенттің жоғарғы палатасы Бюросының отырысы туралы хабарлады.
Дариға Назарбаеваның төрағалық етуімен бюро мүшелері Мәжілістен түскен заң жобаларын бөлді.
“Қазақстан Республикасының Ұлттық қорынан 2019 – 2021 жылдарға арналған кепілдендірілген трансферт туралы ” заңға енгізу туралы” және “2019-2021 жылдарға арналған республикалық бюджет туралы” Заңға өзгерістер мен толықтырулар енгізу туралы” заң жобалары бойынша қаржы және бюджет комитеті басты жоба ретінде айқындалды.
Халықаралық қатынастар, қорғаныс және қауіпсіздік комитеті “Қазақстан Республикасының Үкіметі мен Тәжікстан Республикасының Үкіметі арасындағы өтеусіз әскери-техникалық көмек көрсету туралы келісімді ратификациялау туралы” заң жобасын одан әрі пысықтауды ұйымдастыру жұмысымен айналысады.
“Қазақстан Республикасының кейбір заңнамалық актілеріне көлік мәселелері бойынша өзгерістер мен толықтырулар енгізу туралы” заң жобасымен экономикалық саясат, инновациялық даму және кәсіпкерлік комитеті жұмыс істейтін болады.
Бюро 28 наурызда өтетін Парламент Сенаты отырысының күн тәртібіне Сенат депутаты Қ. Қожамжаровтың ант беру және оны Сенаттың тұрақты комитетінің құрамына сайлау туралы, Сенаттың Халықаралық қатынастар, қорғаныс және қауіпсіздік жөніндегі тұрақты комитетінің төрағасын сайлау туралы мәселелерді енгізу туралы ұсынысты қарады.
Сенат төрағасы Дариға Назарбаева әріптестерінің назарын 4 сәуірде өтетін республикалық бюджетке енгізілетін түзетулерді қарастыруға аударды. Ол Сенаттың тұрақты комитеттерінің төрағаларына бұл мәселені комитеттер отырыстарында қарауды тапсырды.
Сурет: inform.kz
