Қазақстанның Ақпарат және қоғамдық даму министрлігінде бұқаралық ақпарат құралдарының мониторингін есептеу әдістемесінің нормаларын жетілдіруге қатысты бұйрық шығарылды. Бұл туралы “ҚазАқпарат”ХАА хабарлады.
2019 жылғы 5 тамызда Қазақстан Республикасы Ақпарат және қоғамдық даму министрлігі № 263 “Қазақстан Республикасының аумағында таратылатын бұқаралық ақпарат құралдарына мониторинг жүргізу қағидаларын және оны есептеу әдістемесін бекіту туралы “Қазақстан Республикасы Ақпарат және қоғамдық даму министрінің 2019 жылғы 29 сәуірдегі № 84 бұйрығына өзгерістер енгізу туралы” бұйрық қабылдады және Қазақстан Республикасы Әділет министрлігіне мемлекеттік тіркеуге жіберілді.
Бұйрық Қазақстан Республикасының аумағында таратылатын бұқаралық ақпарат құралдарының мониторингін есептеу әдістемесінің нормаларын жетілдіру мақсатында әзірленді, атап айтқанда бұйрықпен мынадай түзетулер көзделген:
1)”ақпараттық-талдамалық телебағдарлама” ұғымының анықтамасы “белгілі бір уақыт аралығында” деген сөздермен толықтырылады, өйткені тәжірибеде тек жеті күнтізбелік күннің қорытындылары бойынша ғана емес, сонымен қатар күн, ай, жартыжылдық, жыл қорытындылары бойынша да ақпараттық-талдамалық бағдарламалар бар.
2)мониторинг объектісі нақтыланады, яғни теле – радиобағдарламаларда таратылатын музыкалық туындылар “телерадио хабарларын тарату туралы”Заңның 10-бабының 2-тармағында белгіленген заңнама талаптарының сақталуы тұрғысынан мониторингте ескерілмейтін болады.
3) бұқаралық ақпарат құралдарына мониторинг жүргізуді есептеу әдістемесінің 35-тармағының редакциясы “телерадио хабарларын тарату туралы”Заңның 30-бабының 1-тармағына сәйкес келтіріледі.
Өз кезегінде мемлекеттік тіркеу жүргізілгеннен кейін (күшіне енгеннен кейін) № 263 бұйрық Қазақстан Республикасы нормативтік құқықтық актілерінің эталондық бақылау банкіне ресми жариялауға жіберілетін болады.
Сондай-ақ, № 263 бұйрық оның бірінші күнінен кейін қолданысқа енгізіледі
Сурет: inform.kz
