Қостанай облысы полиция департаментінің басшысы Бекет Аймағамбетов «Автобус» жедел-алдын алу іс-шарасы аясында жолаушылар тасымалы кәсіпорындарының өкілдерімен кездесіп, Рудный қаласындағы проблемалық мәселелерді тыңдады. Бұл туралы облыстық полиция ведомствосының баспасөз қызметі хабарлайды.
Облыстың бас полицейі Рудный қаласында полицияның фронт-кеңсесінде азаматтарды қабылдап, «Қостанай автовокзалы» ірі автокәсіпорынына барды.
Автокәсіпорынның басшысы Ботагөз Бопатаева облыстық полиция ведомствосының басшысына бүгінгі таңда жолаушылар тасымалы саласында екі үлкен проблема бар екенін айтты. Олар:заңсыз тасымалдаушылар мен техникалық байқаудың сапасы.
«Біздің кәсіпорын ең ірі, біздің 200 автобустымыз бар. Өткен жылы қоғамдық көлікті техникалық тексеру үшін сапалы жабдықтар сатып алынды. Бізде кез келген көлік техникалық байқаудан өте алады. Бірақ біз бүгін бұл қызметті,байқаудан өтпестен, WhatsApp арқылы сатып алуға болатынын білеміз. Көптеген адамдар лицензия алады, автобусты қай жерде тексеретінін айтпағанда, қажетті жабдықтары да жоқ. Сөйтіп техникалық байқаудан өткендігі туралы талон беріледі», — деді ол.
Өз кезегінде Бекет Аймағамбетов кәсіпорында барлық қажетті жабдықтар орнатылған және тексеру шұңқырлары бар екенін атап өтті.
«Егер осындай техникалық байқаудан өтсек, көптеген мәселелер жойылады. Бүгін елімізде,дәл осы себеппен,бірнеше ірі жол-көлік оқиғасы орын алды. Бүгін біз көлік бақылау өкілдерімен бірге барлық жүргізушілердің көліктерінің техникалық жағдайын сапалы тексеруден өту тетіктері туралы мәселені пысықтап жатырмыз», — деді Аймағамбетов.
Қорытындылай келе, облыстық полиция ведомствосының басшысы «Автобус» жедел-алдын алу іс-шарасының бірінші күні облыста автобус жүргізушілерінің 97 тәртіп бұзушылығы тіркелгенін айтты.
