Қостанай қалалық №2 сотының қызметкерлері Әулиекөл ауданының бұрынғы әкімі Асхат Кисиков пара алғаны үшін сотталып, бас бостандығынан айырылды. Бұл туралы облыстық соттың баспасөз қызметі хабарлады.
Облыстық сот өкілдерінің ақпараты бойынша, бұрынғы әкім «Гренада» өндірістік-коммерциялық фирмасы» ЖШС директорынан пара алды.
«Сотқа дейінгі тергеу жедел түрде жүргізілді. Сотта бұның мән-жайлары дәлелденді. Сотталушы кінәсін толық мойындады. №2 сот үкімімен Кисиков кінәлі деп танылды. Оған қауіпсіздігі ең төмен қылмыстық-атқару жүйесі мекемелерінде жазасын өтеуге 3 жыл 6 ай мерзімге бас бостандығынан айыру жазасы тағайындалды»,-деп ақпарат берді сот қызметкерлері.
Сондай-ақ, сотталған адам өмір бойы мемлекеттік қызмет атқару және құқық қорғау органдарында еңбек ету құқығынан айырылды.
Сонымен қатар, шенеунікке пара берген компания директоры да екі жыл мерзімге бас бостандығынан айырылды. Ол да мемлекеттік қызмет атқару құқығынан айырылды.
