Жаңа орталықта әйелдерге бизнесті ашу және жүргізу бойынша консультациялық және әдістемелік көмек көрсетілетін болады. Бұл туралы «әйелдердің экономикалық мүмкіндіктерін кеңейту шаралары мен құралдары» сараптамалық отырысында белгілі болды, деп ҚазАқпарат тілшісі өңірлік кәсіпкерлер палатасының баспасөз қызметіне сілтеме жасап хабарлайды.
«Әйелдер кәсіпкерлігін дамыту жөніндегі ресурстық орталықтар Қазақстанның 17 өңірінде пайда болады. Осы мақсатта сараптамалық отырыста Қазақстанның Ұлттық экономика министрлігі, ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия және «Атамекен»ҰКП арасында үшжақты меморандум жасалды. Менің ойымша, бұл біздің әйелдерге өздерін жүзеге асыруға көмектесетін өте маңызды бастама. Ресурстық орталықтың мақсаты-ақпараттандыру ғана емес, жобаларды нақты қолдау және сүйемелдеу», — деп түсіндірді Қостанай облысының іскер әйелдер кеңесінің төрайымы Наталья Булатова. Отырыста сөз сөйлеген ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның төрайымы Лаззат Рамазанова ресурстық орталықтар базасында әйелдер бизнесін насихаттауға бағытталған зерттеу, маркетинг, оқыту және басқа да іс-шаралар өткізілетінін атап өтті. Тағы бір маңызды жаңалық — «Отбасы банк» АҚ Басқарма Төрайымы Ләззат Ибрагимова айтқан әйелдерге арналған ипотекалық несие бағдарламасының іске қосылуы туралы ақпарат болды. Бағдарламаны іске асыруға АДБ 38 млрд.теңге сомасында қарыз тартты. Осы қаражат есебінен банк өзіне немесе балаларына тұрғын үй сатып алғысы келетін 3 970 әйелді қаржыландыруды жоспарлап отыр.
