Қостанай облысында 10 адамнан тұратын, есірткі затын сататынына күдікті қылмыстық топ ұсталды. Бұл туралы ҚР Ішкі істер министрлігінің баспасөз қызметі хабарлады.
ІІМ қызметкерлері мен Қостанай облысының полицейлері ұзақ дайындалғаннан кейін аймақта есірткі сатқан ұйымдасқан қылмыстық топты (ҰҚТ) ұстады. Қылмыскерлерді ұстау Рудный және Федоров аудандарында бір уақытта жергілікті полиция департаменті арнайы мақсаттағы бөлімше жауынгерлерінің қатысуымен өтті», – делінген сәрсенбі күнгі хабарламада.
Ведомствоның ақпаратына сәйкес, қылмыстық топтың он қатысушысы арасында міндеттер нақты бөлінген. Олардың арасында ұйымдастырушылар, курьерлер мен жеткізушілер болды.
Қазіргі уақытта алтауы уақытша ұстау изоляторына қамалды, төртеуіне ешқайда шықпау туралы қолхат берілді», – деп нақтылады ІІМ-де.
Күдіктілерді ұстау және олардың тұрғылықты жерін тінту кезінде сатуға арналған 400 грамм героин, 3,5 миллион теңге және 6,5 мың доллар қолма-қол ақша, көптеген алтын бұйымдар мен бес машина табылды.
Қылмыстық топты ұйымдастырушылар мен оған қатысушыларға қатысты ҚР ҚК 262-бабының 1-бөлігі (ҰҚТ құру және басқару), ҚР ҚК 262-бабының 2-бөлігі (ҰҚТ қатысу), ҚР ҚК 297-бабының 3-бөлігі (аса ірі көлемде есірткі өткізу) бойынша сотқа дейінгі тергеу жүргізілуде. Аталған қылмыстарды жасағаны үшін заң бойынша мүлкін тәркілеу және 12 жылдан 15 жылға бас бостандығынан айыру жазасы қарастырылған», – делінген хабарламада.
Сурет: sm-news.kz
