Қостанай облысы әкімінің орынбасары Марат Жүндібаев өңірдегі стационарларда қанша адам карантинде жабылғанын айтты. Бұл туралы zakon.kz ақпарат агенттігі хабарлайды.
Облыс әкімі орынбасарының айтуынша, қазір аймақта 291 адам ауруханаға жатқызылып, 2124 адам үй карантиніне жабылды. Олар коронавирусқа шалдыққан 1Б елдерінен келген азаматтар.
Сондай-ақ Марат Жүндібаев қазіргі уақытта қостанайлық медициналық ұйымдарда үш мың дәрі-дәрмек қоры бар екенін мәлімдеді. Сонымен қатар, жақын арада медициналық жабдықтар, дезинфекциялау құралдары, қорғаныс комбинезондары мен маскалар сатып алынады. Осы мақсатта жергілікті бюджеттен 2,1 миллиард теңге бөлінді.
Бұрынырақ Қостанай облысында коронавирустық инфекцияны жұқтырудың алғашқы жағдайы тіркелгені хабарланған, оның алдында бұл аймақ Қазақстанда вирус анықталмаған жалғыз облыс екені айтылған.
Соңғы мәліметтерге сәйкес, Қазақстанда коронавирус жұқтырудың 464 жағдайы тіркелді, 29 азамат емделді.
