Атаулы әлеуметтік көмек (АӘК) алуға құжаттарды онлайн тапсыруға болады. Бұл туралы Қостанай облысы әкімдігінің жұмыспен қамтуды үйлестіру және әлеуметтік бағдарламалар басқармасы басшысының орынбасары Максим Устинов мәлімдеді, деп “ҚазАқпарат”ХАА хабарлайды.
Атаулы әлеуметтік көмек алуға өтінімдер екінші тоқсанға қабылданады. “1 сәуірден бастап атаулы әлеуметтік көмекке өтініш берушілер электрондық үкімет порталы арқылы жүгіне алады, яғни ЭЦҚ-мен осы порталға кіріп, АӘК бере алады. Мүмкіндігі жоқ, компьютері жоқ немесе интернеті жоқ адамдар жұмыспен қамту бөліміне, жұмыспен қамту орталығына, өздері тұратын ауылдық округ әкімдігіне немесе өзіне – өзі қызмет көрсету бұрыштарына жүгіне алады”, – деді М.Устинов. Өңірлік коммуникациялар қызметінде атап өткендей, онлайн-өтінім беру коронавирустық инфекцияның таралуына жол бермеу мақсатында ұйымдастырылды. Құжаттар egov.kz электрондық үкімет порталы арқылы қабылданады.
