Жол тосқауылдарында қызмет ету үшін Жамбыл облысының әскери қызметшілері Қостанай облысына келеді, деп хабарлайды qostanay.tv ақпараттық агенттігі.
Оңтүстік өңірден барлығы 200 әскери қызметші келеді. Олар ішкі істер органдарының қызметкерлеріне Қостанай облысына кірерде қойылған жол тосқауылдарында кезекшілікке көмектесетін болады.
Бұл туралы Қостанай полиция департаменті бастығының орынбасары Негмет Ысмағұлов өз ойын білдірді. Ол аймақта барлығы 10 жол тосқауылы қойылғанын, облысқа кіруге және шығуға тыйым салынғанын айтты.
«Сыбайлас жемқорлық құқық бұзушылық және қылмыс фактілерін болдырмау үшін жеке қауіпсіздік басқармасының қызметкерлері осы бекеттер қызметін жасырын тексеруді ұйымдастырады», — деді Негмет Ысмағұлов.
Бұл шаралар Қостанай облысында коронавирус инфекциясының таралуын болдырмау мақсатында қабылданып жатыр.
Бүгінгі таңда Қазақстанда Президент Қасым-Жомарт Тоқаевтың тапсырмасы бойынша төтенше жағдай режимі енгізілді. Ол 15 сәуірге дейін созылады, бірақ қажет болған жағдайда ұзартуы мүмкін.
Сурет: express-k.kz
