Халықаралық әйелдер күні қарсаңында Мәскеуде орыс ақыны Владимир Исайчевтің «Дарю любовь» өлеңдер жинағының тұсаукесері қазақ тілінде өтті, ақынның өлеңдерін “Махаббат сыйлаймын” деген атпен аударған Айгүл Садуова деп хабарлайды “Хабар 24” ақпараттық агенттігі.
Автор Ресейде ақын ғана емес, қоғам қайраткері ретінде де танымал. Ол шығармашылық пен терең лирикалық туындыларды жазуды мемлекеттік қызметпен ұштастыра алады. Владимир Исайчев – белгілі заңгер, Жоғары Төрелік сот төрағасының орынбасары және Ресей Жазушылар одағының тең төрағасы. Оның шығармалары көптеген елдердің тілдеріне аударылған, олардың негізінде көптеген музыкалық шығармалар, соның ішінде әндер, романстар және музыкалық қойылымдар жазылған. Бұл шығармашылық тандемнің бірінші бірлескен жұмысы емес. Бірнеше жыл бұрын Айгүл Садуованың аудармасында “Көктем романстары” атты өлеңдер жинағы жарық көрді.
Владимир Исайчев, ақын: – мен Қазақстан табиғатының әсерімен осы кітапқа енген бірнеше өлең жаздым. Сол кезде осы өлеңдерді Қазақстанда поэзия сүйер қауым да естуі керек деген идея пайда болды. Аударма Халықаралық Жазушылар одағы мен Қазақстан Жазушылар одағының бастамасы бойынша жүзеге асырылды.
