Бүгін президент Қасым-Жомарт Тоқаев парламенттік сайлау келесі жылдың 10 қаңтарында өтетіні туралы Жарлыққа қол қойды. Осы күні мәслихаттар сайлауын да өткізу жоспарланып отыр. Бұл бюджетке қаншаға түсетінін туралы Орталық сайлау комиссиясының хатшысы Сәбила Мұстафина хабарлады.
Ол Мәжіліс пен мәслихат сайлауын өткізуге 15,3 миллиард теңге жұмсау жоспарланып отырғанын мәлімдеді. Бұл ретте алдағы сайлау науқаны екі бюджеттік жылға қарастырылды.
Биылғы жылғы болжамды смета 10,8 миллиард теңгені құрайды. Оның 7,3 миллиард теңгесі сайлау комиссиясының мүшелеріне жалақы төлеуге, ал 3,5 миллиард теңгесі ұйымдастыру шығыстарына қарастырылған.
Келесі жыл сметасының мөлшері — 4,5 миллиард теңге, ол түгелімен барлық деңгейдегі сайлау комиссиялары мүшелерінің еңбегіне ақы төлеуге бағытталатын болады.
Мұстафина коронавирусқа байланысты Мәжіліс пен мәслихаттар сайлауы карантин ережелерін қатаң сақтай отырып өтетінін, сондықтан сайлау комиссияларының мүшелерін жеке қорғаныс құралдарымен қамтамасыз ету үшін 341,4 миллион теңге шығын қарастырылғанын атап өтті.
Сурет: kstnews.kz
