Орталық коммуникациялар қызметінде өткен брифингте Қазақстан Бас прокуратурасының арнайы прокурорлар қызметінің бастығы Ризабек Ожаров Қордай оқиғасының тергеу барысы туралы айтты.
Қадағалау органы өкілінің айтуынша, қазір Қордай ауданындағы жаппай тәртіпсіздік фактісі бойынша 29 қылмыстық іс тергелуде. Оның айтуынша, 400-ден астам түрлі сот сараптамасы жүргізіліп, бір жарым мыңнан астам адамнан жауап алынды.
Сондай-ақ, брифинг барысында Ризабек Ожаров Қордай тәртіпсіздіктеріне қатысқаны үшін қылмыстық жауапкершілікке қазақтар мен дүнгендерден барлығы 59 адам тартылғандығын хабарлады.
Сонымен қатар, Бас прокуратура өкілі Қордайдағы қақтығысқа қатысушылардың басым бөлігі — жастар, жұмыссыз азаматтар және бұрын сотталған адамдар екенін атап өтті.
Қордай ауданындағы жаппай тәртіпсіздік нәтижесінде 11 адам қаза тауып, жүзден астам дене жарақатын алған оқиға 2020 жылдың 8 ақпанына қараған түні орын алды.
Бұдан бұрын Жамбыл облысы әкімінің орынбасары Ержан Жылқыбаев Кордайдағы қоғамдық-саяси жағдай тұрақты, аудан экономикалық дамуда екенін айтты.
