«ҚазМұнайГаз» ҰК АҚ басқарма төрағасы Данияр Тиесов Орал-Каспий арнасы арқылы тағы да кемелер жүретінін хабарлады.
Оның айтуынша, бұл Атырау облысында газ-химия кешенін салу кезінде аса маңызды ірі габаритті жабдықтарды теңіз көлігімен жеткізу үшін қолданылған.
«Тасымалдау келесі жылдың жазында басталады. Тасымалданатын жүктердің жалпы тоннажы 5 500 тоннаны құрайды. Қаржылық және практикалық тұрғыдан қарағанда теңіз жүктерін ауыстырып тиеудің неғұрлым орынды пункті «Атырау» порты болып табылады. Алайда Орал өзенінің сағасы бұрыннан тазартылмаған. Жайық-Каспий кеме қатынасы арнасының түбін тереңдету ұзақ уақыт жүргізілген жоқ. Жайық өзенінің сағасы және каналдың тайыздығы жүк тиелген кемелерге портқа өтуге мүмкіндік бермейді», — деді Данияр Тиесов.
Осыған байланысты Орал-Каспий каналында ірі габаритті жүгі бар кемелердің «Атырау» портына қауіпсіз өтуін қамтамасыз ету үшін түбін тереңдету жұмыстары жүргізілетін болады.
«ҚазМұнайГаз» басқарма басшысы су түбін тереңдету жұмыстарына Атырау облысынан компаниялар тартылғанын атап өтті. Осы жылдың тамыз айында Орал-Каспий каналының түбіне қажетті батиметриялық өлшеулер жүргізілді және жұмыс жобасы әзірленді. Жақын арада олар жүзеге асырылады.
«Бұл жұмыстар аймақтың экологиясы мен экономикасы үшін оң мультипликативті нәтиже беретінін атап өткен жөн. Ол өзеннің экологиялық жағдайының жақсару,ы, Жайық-Каспий арнасындағы балық популяциясын арттыру, өзен бойынша коммерциялық кеме қатынасын жаңарту», — деді Данияр Тиесов.
