Қазақстан Қорғаныс министрлігінде төтенше жағдай режимін қамтамасыз ету мәселесі бойынша кеңес өтті, деп қорғаныс ведомствосының баспасөз қызметі хабарлады.
Селекторлық режимде өткен мәжіліс кезінде Министрлік басшысы Нұрлан Ермекбаев осы режимді қамтамасыз ету үшін ведомство тарапынан қандай шаралар қабылдау керектігін айтты.
Мәселен, оларға жоғары жауынгерлік дайындықты сақтау, диверсияға қарсы қорғаныс және маңызды әскери объектілерді қорғау жатады. Сондай-ақ, медициналық мекемелер гарнизондардан шығуды қоса алғанда, халықтың денсаулығын сақтау жөніндегі іс-шараларға қатысуға дайын болу керек.
Радиациялық, химиялық және биологиялық қорғау бөлімшелері аумақтар мен объектілерге арнайы өңдеу жүргізуге дайын болуы қажет.
Сонымен қатар қажетті көмек дер кезінде көрсетілуі үшін автокөліктер мен арнайы техника толық дайын болуы тиіс. Бұдан басқа, Қазақстандықтардың мүддесінде казармалық-тұрғын үй және коммуналдық-пайдалану қорларын пайдалану мүмкіндігі көзделеді.
Қарулы Күштерде коронавирустық инфекцияның таралуына жол бермеу үшін санитарлық және медициналық бағыттағы шаралар күшейтілді. Сондай-ақ, жауынгерлік әзірлікті сақтауға нұқсан келтірмейтін ұйымдастырушылық іс-әрекеттер жасалды.
Осылайша, жаппай іс-шаралардың күшін жойды, әскери бөлімдерден босатуға тыйым салынды, олардың туыстарымен байланысын шектеді. Алайда, оларға туыстарымен байланыс үшін қазіргі заманғы гаджеттерді жиі пайдалануға рұқсат етіледі.
Осы бағыттағы барлық күш-жігерді төтенше жағдайдың барлық кезеңінде әрекет ететін оперштабты үйлестіреді.
Сурет: yandex.ru
