Еліміздің Қорғаныс ведомствосындағы аппараттық кеңес кезінде жеке құрамды жауынгерлік даярлау мен оқытуға қатысты мәселелер, сондай-ақ коронавирустық инфекциямен күреске бағытталған іс-шаралар талқыланды. Бұл туралы Қорғаныс министрлігінің баспасөз қызметі хабарлады.
Бүгінгі күні Қазақстанның Қарулы Күштерінде жазғы оқу кезеңінде басқару органдары мен әскерлерді дайындаудың бірыңғай кешенді стратегиялық міндеті көзделген іс-шаралар жалғасуда.
Қорғаныс министрі Нұрлан Ермекбаев сабақтарды өткізу бағдарламаларын алдын ала дайындау және нақтылау қажеттігі туралы мәлімдеді. Кеңесте атыс дайындығы мәселесі жеке қаралды. Қазіргі заман талабына сай жасалған оқу бағдарламаларын сапалы меңгеру қажеттігі атап өтілді.
Әскери-теңіз әскерлерінің даярлығының маңызды кезеңі экипаждың техникалық құралдар мен қару-жарақты басқара білу, шартты қарсыласты жоюға бағытталған оның іс-қимылдарының үйлесімдігі деп аталды.
Әуе қорғанысы күштеріне ӘҚК Әскери институтының бағдарламасы шеңберінде курсанттарды даярлауды орындау тапсырылды.
Сондай-ақ, күзгі-қысқы кезеңде коронавирустық инфекциямен күрес жоспары әзірленді. Ведомствода жоспарды сапалы жүзеге асыру және адамдар көп жиналатын жерлерді дезинфекциялау бойынша іс-шараларда жергілікті органдармен өзара іс-қимыл жасау қажеттілігі туралы мәлімдеді.
Сурет: gov.kz
