Біздің республикамыздың сыбайлас жемқорлыққа қарсы бірінші департаментінің аса маңызды істер жөніндегі аға тергеушісі Данияр Бигайдаров Қорғаныс министрлігі қатарында анықталған сыбайлас жемқорлық қылмыстары туралы айтты.
Брифинг барысында Биғайдаров қорғаныс ведомствосының өкілдеріне қатысты осы жылдың жеті айында сыбайлас жемқорлық фактісі бойынша 31 қылмыстық іс тіркелгенін хабарлады. Бұл өткен жылмен салыстырғанда үш есе көп.
Тергеуші 31 қылмыстық істің 22-сі сотқа жіберілгенін, олар бойынша Қорғаныс министрлігінің 7 лауазымды тұлғасы сотталғанын айтты.
Мысал ретінде Биғайдаров қорғаныс ведомствосының кадрлар департаменті бастығының орынбасарын келтірді, ол белгілі бір ақыға әскери қызметшілерді басқа өңірлерден Алматы әскери бөлімдеріне ауыстырған.
Тергеу нұсқасына сәйкес, оңтүстік астананың әскери бөлімдеріне ауыстыру үшін сарбаз 800 мыңнан 1,1 миллион теңгеге дейін төлеуі керек болған.Төлем делдал-офицерлер арқылы жүзеге асырылған.
Қазір кадрлар департаменті бастығының орынбасарына қатысты барлық сотқа дейінгі тергеу рәсімдері жүргізілуде.
Сурет: inform.kz
