Радиациялық, химиялық және биологиялық қорғау әскерлері департаментінің бастығы подполковник Ержан Құлмағамбетов елімізде жүргізіліп жатқан дезинфекциялық жұмыстар туралы айтты, деп хабарлайды “ҚазАқпарат” ресурсы.
Қазақстан Республикасында дезинфекциялау жұмысы коронавирустық инфекцияның таралуын болдырмау және азаматтардың өмірінің қауіпсіздігін қамтамасыз ету мақсатында жүргізілуде.
Ержан Құлмағамбетов індет басталғаннан бері әскери қызметшілер Қазақстанның 29 қаласындағы 14 мыңнан астам нысанды дезинфекциялық ерітіндімен өңдегегін мәлімдеді.Сонымен қатар, оның айтуынша, өңдеген нысандардың жалпы аумағы 6 мың гектарды құрайды.
Құлмағамбетовтың айтуынша, қазір дезинфекциялау жұмыстары республикамыздың 10 қаласында жүргізіліп жатыр. Жалпы алғанда, оған 300-ден астам адам тартылған.
Сондай-ақ, еліміздің қорғаныс ведомствосы департаментінің бастығы Қазақстанның нысандары мен жолдарын өңдеу кезінде әскери дезинфекторлар қандай дезинфекциялық ерітінділерді қолданатынын айтты.
“Бізді дезинфекциялық препараттармен әкімдіктер қамтамасыз етеді. Атаулары көп, бірақ олардың барлығындың құрамында хлор немесе басқа тотықтырғыштар бар”, – деді ол.
Ержан Құлмағамбетов дезинфекциялық жұмыстар кезінде қолданылатын заттар халық арасында коронавирустық инфекция мен пневмония ауруының өсуіне ешқандай әсер етпейтінін баса атап өтті.
Соңғы мәліметтерге сәйкес, Қазақстанда коронавирусты жұқтырудың жалпы саны 86192-ге жетті, ал елімізде 56638 адам осы аурудан айықты.
Сурет: 24.kz
