Қазақстан Қорғаныс министрі Нұрлан Ермекбаев Алматы гарнизонындағы әскери бөлімдер мен мекемелерді тексерді. Бұл туралы ҚР Қорғаныс министрлігінің баспасөз қызметі хабарлайды.
Тексеру барысында ӘОСК тау дайындығы орталығының бастығы полковник А. Каймульдиновтың, сондай-ақ парашюттік дайындық орталығының бастығы подполковник Л. Дудкиннің баяндамалары тыңдалды және талқыланды. Онда әскери қызметкерлердің тау дайындығын және Қазақстан Республикасы Қарулы Күштерінде парашюттік дайындықты дамыту перспективалары туралы айтылды.
Министр радиоэлектроника және байланыс Әскери-инженерлік институтының қызметімен танысты. Қызметті одан әрі оңтайландыру және жетілдіру бойынша тапсырмалар берілді.
Сапар соңында Қорғаныс министрі Қарулы күштердің ардагері, әскери ғылым докторы, ҚР еңбек сіңірген қайраткері, профессор, запастағы полковник, жуырда 85 жылдығын атап өткен Ким Серікбаевпен кездесті.
Естеріңізге сала кетейік, Нұрлан Ермекбаев өткен жылдың тамыз айында президенттің көмекшісі — Қауіпсіздік Кеңесінің хатшысы лауазымынан босатылып, Қорғаныс министрі қызметіне тағайындалды.
Сурет: zakon.kz
