ОПЕК+ министрлік мониторинг комитеті мұнай өндіру көлемін қысқартуға байланысты келісімді орындауды талқылау жоспарланған отырысты бастады, деп хабарлайды ТАСС.
Отырыс осы комитетке мүше елдердің, атап айтқанда Қазақстан, Ресей, Сауд Арабиясы, Біріккен Араб Әмірліктері, Алжир, Венесуэла және Ирактың қатысуымен бейнеконференцбайланыс арқылы өткізіледі.
Мамыр айының қорытындысы бойынша қара алтын өндіруді қысқарту деңгейін талқылау және ағымдағы және алдағы кезеңдерге деген ниеттерін растау, тараптардың мұнай нарығындағы жағдайы туралы баяндаманы талқылау және оның алдағы айларда даму сценарийін қарайды деп жоспарлануда.
Бұған дейін Қазақстан энергетика министрлігінің басшысы Нұрлан Ноғаев мамыр айында біздің еліміз ОПЕК+ келісіммен белгіленген мұнай өндіру көлемінен 3,13 миллион баррельге асырғанын, осыған байланысты оларды өтеу биылғы жылдың тамыз-қыркүйек айларында жоспарланғанын айтқан болатын.
Энергетика министрлігінің мәліметінше, биыл Қазақстан Республикасы 86 миллион тонна мұнай өндіруді жоспарлап отыр. Өткен жылы бұл көрсеткіш 90,5 миллион тонна қара алтынды құраған.
Сурет: gazeta.ru
