Алматы қаласы бойынша Ұлттық қауіпсіздік комитетінің департаменті Шымкент қаласы бойынша ҰҚКД-мен бірлесіп Бразилиядан БАӘ арқылы Қазақстанға және одан әрі Түркияға кокаин жеткізудің халықаралық арнасын анықтап, жолын кесті, деп ХАА «ҚазАқпарат» хабарлайды ҚР ҰҚК баспасөз қызметіне сілтеме жасап.
Атап айтқанда, ағымдағы жылдың наурыз айында Алматы бойынша ҰҚКД Алматы әуежайындағы жедел-іздестіру іс-шаралары барысында кокаинді контрабандалық жолмен әкелуге күдікті ретінде «Дубай-Алматы» әуе рейсінің жолаушысы ҚР азаматы М. Сатыбалдиев ұсталды.
Тексеру жүргізу барысында ұсталған адамнан, оның ішінде Алматы қаласының қалалық клиникалық ауруханасы жағдайында емдеу мекемесінің медициналық қызметкерлері жүргізген емшаралар арқылы асқазан-ішек жолында жалпы салмағы 460 грамм кокаині бар 42 капсула табылды және алынды.
Жедел-тергеу іс-шараларын жүргізу нәтижесінде аталған есірткі партиясын Бразилиядан Қазақстанға контрабандалық жолмен жіберуді ұйымдастырған Л. Құрманбаеваның туыстық байланысы қолға түсті.
Ағымдағы жылдың маусым айында Алматы қаласының қылмыстық істер жөніндегі мамандандырылған ауданаралық сотының үкімімен Л. Құрманбаева мен М. Сатыбалдиев ҚР ҚК-нің 297-бабының 3-бөлігі және 286-бабының 4-бөлігі бойынша кінәлі деп танылып, 15,5 жылға бас бостандығынан айырылды.
