Қазақстан астанасында ҚР Президенті Қасым-Жомарт Тоқаевтың төрағалығымен ұлттық қоғамдық сенім кеңесінің екінші отырысы басталды, деп ХАА «ҚазАқпарат» хабарлайды.
Іс-шара Тәуелсіздік сарайында өтуде. Бұдан бұрын хабарланғандай, отырыс шеңберінде МТҰК мүшелерінің, жұртшылық пен азаматтық қоғамның ұсыныстарын ескере отырып, саяси, экономикалық, әлеуметтік-мәдени жаңғырту бойынша маңызды мәселелер қаралатын болады.
Естеріңізге сала кетейік, мемлекет басшысының төрағалығымен МТҰК бірінші отырысы 2019 жылдың 6 қыркүйегінде өтті.
30 қазанда Президент қоғамдық сенім Ұлттық кеңесінің мүшелерімен кездесулер өткізді. Кездесу барысында азаматтық қоғамның келешегі және құқық қорғау ұйымдарының мемлекеттік органдармен өзара іс-қимылы, «естуші мемлекет» тұжырымдамасын іске асырудағы социологиялық зерттеулер талқыланды, Қоғамдық кеңестер институтының қызметін жетілдіру, жоғары оқу орындарының автономиясын енгізу, медициналық сақтандыруды енгізу бойынша ұсыныстар қаралды.
Ұлттық кеңес құру туралы Мемлекет басшысы 2019 жылы 12 маусымда өткен инаугурация салтанатында жариялады.
2019 жылғы 17 шілдеде Қазақстан Республикасының Президенті Қасым-Жомарт Тоқаев «Қазақстан Республикасы Президентінің жанындағы ұлттық қоғамдық сенім кеңесінің ережесі мен құрамын бекіту туралы» жарлыққа қол қойды.
Ұлттық кеңестің құрамына белгілі қоғам қайраткерлері, Мәжіліс депутаттары, экономистер, саясаттанушылар кірді.
Ұлттық кеңесті Қазақстан Республикасының Президенті басқарады. Ұлттық Кеңестің жұмыс істеу қағидасын бұрын Президент кеңесшісі Ерлан Қарин түсіндірді.
