Мәжіліс Төрағасы Нұрлан Нығматулин жергілікті өзін-өзі басқару бюджеті қаражатын тиімді әкімшілендірудің маңыздылығына назар аударды. Бұл туралы Мәжілістің баспасөз қызметі хабарлады.
Бүгін Мәжілістің жалпы отырысында депутаттар биліктің аудандық, қалалық және ауылдық деңгейлерінің дербестігі мен жауапкершілігін кеңейту мәселелері жөніндегі заңнамалық түзетулерді бірінші оқылымда мақұлдады.
Заңнамалық нормаларды талқылау барысында Мәжіліс депутаттары аудандық маңызы бар қалаларда, ауылдарда, кенттер мен ауылдық округтерде мамандардың бюджетті тиімді басқаруға және игеруге дайындығы мәселелерін көтерді, олар салықтың 4 түрін беру есебінен ұлғайтылады.
“Шынында да, ауылдық округтердің бюджеті артып келеді. Бірақ сонымен бірге жауапкершілік артады. Бұл ақшаны не үшін жұмсау туралы шешімді ауылдық округ әкімі жеке өзі қабылдамауы тиіс”, – деп Мәжіліс Төрағасы атап өтті.
Сонымен қатар, Нұрлан Нығматулин 2018 жылы қабылданған жергілікті өзін-өзі басқару туралы Заңға сәйкес, мұндай шешімдер бірінші кезекте ақша бағыттайтын мәселелердің басымдығын, кезектілігін анықтау құқығы бекітілген ауыл тұрғындарының жиналысы арқылы қабылданатынын еске салды.
Жаңа Заң жобасында әкімдердің аппараттарына өз бюджеттерін 20% – дан аспайтын көлемде түзетуге мүмкіндік беріледі. Бұдан басқа, бюджеттерді бекіту рәсімі оңайлатылады, сондай-ақ меншікті түсімдер көлемінің 10% – ынан аспайтын мөлшерде ауылдық бюджет резервін құру көзделеді.
“Жергілікті өзін-өзі басқарудың дербес бюджетін нақты іске асыру үшін әкімдердің өздерінің дайындық деңгейі маңызды. Олар осы бюджеттік мәселелерді түсінуі тиіс”, – деп Мәжіліс Спикері атап өтті.
Сурет: inform.kz
